Que somos? Profesores! Que queremos? Ser profesores do século XXI

Queiramos ou non, as Tecnoloxías da Información e a Comunicación marcan a nosa vida cotiá, tanto persoal como profesional e, polo tanto, non podemos nin debemos pechar os ollos ante elas. 

Máis alá do seu emprego diario, estas ferramentas ofrécennos unha enorme cantidade de posibilidades para enriquecer o proceso de ensinanza-aprendizaxe, para reciclarnos e para mellorar a conexión cun alumnado que, na maioría das ocasións, está acostumado a manexarse nestes mundos como peixes na auga. 

Tras moitas horas dedicadas ao curso Ambientes persoais de aprendizaxe e redes sociais na educación (PLE e PLN) teño claro que algunhas prácticas deben ser parte do noso quefacer diario nas aulas e que é a nosa obriga ensinar ao noso alumnado a desenvolverse adecuadamente por ese maremagnum que é a rede. Como poden gardar e clasificar a información importante? Como poden convertirse en curadores de contidos? Como poden traballar colaborativamente en equipo?

Este curso, a través do proxecto LdC, intentaremos dar resposta a todos estes elementos para que todos sexamos competentes nun mundo, cada vez máis, dixital.